ថ្មីៗនេះ រូបភាពបុរសអាយុច្រើនម្នាក់ ស្លៀកសម្លៀកបំពាក់មនុស្សស្រីដើររើសសំរាមដោយអំណត់ ត្រូវបានចែកចាយយ៉ាងទូលំទូលាយលើបណ្តាញសង្គម ។
បុរសនោះមានឈ្មោះថា Guo Xues អាយុ ៥០ ឆ្នាំ បច្ចុប្បន្ន កំពុងរស់នៅទីក្រុងឡឹកយ៉ាង ខេត្ត ហ៊ូណាន ប្រទេសចិន ។ ការងារប្រចាំថ្ងៃរបស់លោក Guo Xues គឺបោលសំរាម និងរើសសំបកដប ។ រាល់ថ្ងៃ លោកត្រូវបើករថយន្តកែច្នៃដ៏កញ្ចាស់របស់លោករាប់សិបជើង ពីកន្លែងប្រមូលសំរាម ទៅដល់កន្លែងលក់ ។ ទោះបីដឹងថា នេះជាការងារលំបាក តែលោក Guo នៅតែប្រឹងប្រែងច្បាមជាប់ ដើម្បីទទួលបានប្រាក់ដ៏ស្តួចស្តើងសម្រាប់ជីវភាពទៅថ្ងៃមុខ ។
ពេលបង្ហាញខ្លួនលើដងផ្លូវម្តងៗ អ្នកដែលបានឃើញលោក សុទ្ធតែបង្ហាញអារម្មណ៍ងឿងឆ្ងល់ និងចម្លែកក្នុងចិត្ត ពីរបៀបស្លៀកពាក់ដ៏ពិសេសខុសពីគេឯងរបស់លោក ។ លោក Guo ចូលចិត្តស្លៀកសំពត់, ខោរឹប និងប្រើរបស់របរដូចជាមនុស្សស្រី ។
«ពេលធំឡើង មិនដូចជាមនុស្សប្រុសដទៃ ខ្ញុំបែរជាចូលចិត្តស្លៀកសំពត់ ។ ឪពុកម្តាយ និងប្អូនស្រីខ្ញុំ២នាក់ សុទ្ធតែមិនយល់ស្របនឹងរបៀបស្លៀកពាក់របស់ខ្ញុំ ។ ប៉ុន្មានឆ្នាំមុននេះ ពេលឪពុកម្តាយខ្ញុំស្លាប់បាត់ទៅ ខ្ញុំចាប់ផ្តើមរស់នៅត្រូវ នឹងបំណងប្រាថ្នារបស់ខ្លួន ។ ខ្ញុំសន្សំប្រាក់ទិញសំពត់អាវ, ស្បែកជើង កាបូប ឬ របស់របរផ្សេងៗ ឲ្យតែជារបស់មនុស្សស្រី», លោក Guo រ៉ាយរ៉ាប់ ។
ទោះបីដឹងថា មានមនុស្សជាច្រើនសើចខ្សឹបខ្សៀវចំអក រិះគន់ តែលោក Guo មិនដែលយកចិត្តទុកដាក់ឡើយ ។ លោកតែងសុទិដ្ឋិនិយមគិតថា ប្រសិនខ្លួនឯងមានអារម្មណ៍ពេញចិត្ត នោះមិនចាំបាច់ចាប់អារម្មណ៍ដល់ពាក្យចំអកចំអន់របស់អ្នកនៅជុំវិញ ។
ពុំត្រឹមតែទាក់ទាញមនុស្សគ្រប់គ្នា អំពីរបៀបស្លៀកពាក់, លោក Guo ក៏មានជីវិតឯកជនគួរឲ្យភ្ញាក់ផ្អើល ។ ការពិតទៅ គាត់ជាមនុស្សស្រឡាញ់ភេទដូចគ្នា ហើយសព្វថ្ងៃ កំពុងរួមរស់ជាមួយគូស្នេហ៍ គឺលោក ស៊ិន(អាយុ ៧២ ឆ្នាំ)។ ៣ឆ្នាំមុន អ្នកទាំងពីរបានជួបគ្នាដោយចៃដន្យ ក្នុងពេលរើសសំរាម ។ បន្ទាប់ពីសំណេះសំណាលប៉ុន្មានដង ពួកគេមានអារម្មណ៍ «ចុះសម្រុង» ហេតុនេះបានសម្រេចចិត្តមករួមរស់ក្នុងផ្ទះតែមួយ ។
លោក Guo ឲ្យដឹងថា សព្វថ្ងៃលោកពេញចិត្តខ្លាំងណាស់ ជាមួយនឹងជីវិតរបស់ខ្លួន ។ គូស្នេហ៍របស់លោកប្រព្រឹត្តចំពោះលោកយ៉ាងល្អ ។ ទោះបីជីវភាពលំបាក តែទាំង២នាក់តែងជួយគ្នា និងផ្តល់ស្នាមញញឹមឲ្យគ្នារាល់ថ្ងៃ ៕
No comments:
Post a Comment